Á Sauðárkróki búa um 2600 manns. Þar er fjölbreytt þjónusta; gisting, veitingar, verslanir, sýningar, söfn, tjaldsvæði, skemmtistaðir, sundlaug, sjúkrahús, verkstæði o.fl. Nýr glæsilegur íþróttaleikvangur er í miðjum bænum, sunnan við sundlaugina, þar sem einnig er strandblakvöllur. Í Minjahúsinu við Aðalgötu eru m.a. til sýnis fjögur lítil verkstæði í anda liðinna tíma.

Brekkurnar ofan við bæinn eru fornir sjávarkambar, Nafir. Á Nöfum er útsýnisskífa og gott útsýni yfir gamla bæinn, sveitirnar í kring og út á fjörðinn. Uppi á Nöfum eru frístundabændur með aðstöðu sína og á vorin er hægt að fylgjast þar með lömbum og folöldum innan girðingar. Golfvöllur og aðstaða Golfklúbbs Sauðárkróks eru einnig uppi á Nöfum. Bærinn dregur nafn sitt af Sauðá og í Sauðárgili er Litli-Skógur. Þar eru göngustígar og góð aðstaða til útiveru.

Verslun Haraldar Júlíussonar í Aðalgötunni hefur starfað óslitið frá árinu 1919, en þar er hægt að upplifa gömlu búðarstemninguna eins og hún var á síðustu öld.

Austan við Krókinn er Borgarsandur, tæplega fjögurra kílómetra löng svört sandfjara, þar sem gaman er að byggja sandkastala, fara í gönguferðir eða leika við börnin. Litlu sunnar, við Áshildarholtsvatn, er fjölskrúðugt fuglalíf og upplýsingaskilti um fugla. Frá Króknum er aðeins um hálftíma akstur í Varmahlíð, Hóla, Hofsós eða Grettislaug, og fyrir vetrargesti tekur aðeins um 15 mínútur að komast á frábært skíðasvæði í Tindastóli.

Menningarlíf á Sauðárkróki stendur í blóma og má þar nefna öflugt leikfélag, tónlistarskóla auk Héraðsskjalasafns Skagafjarðar, en það er eitt besta skjalasafn á landinu. Þangað leita margir fræðimenn sem vilja vinna í friði og ró að sínum rannsóknum. Ennfremur státar bærinn af Minjahúsinu, en þar eru nokkrar sýningar sem vert er að skoða, m.a. vélsmiðja, trésmíðaverkstæði, steinasafn o.fl.

Í Eldsmiðju Ingimundar í Suðurgötu, má sjá eldsmiðju á neðri hæð en íbúð á efri hæð, varðveitt í sinni upprunalegu mynd. Það er því margt að sjá á Sauðárkróki og enginn svikinn af heimsókn þangað.

www.visitskagafjordur.is



Dæmi um fyrirtæki með starfsemi á Sauðárkróki: